Wha is Chappin at Ma Door?
Wha is chappin at ma door?
Gang awa. I amna in.
I hae the pest: I’m stiff and sair,
Baith het and cauld and haufweys blin.
There’s naebdy here. Jist walk on by.
I dinna like yir sleekit face,
Yir fancy claes or weirdo hair.
B’Christ, d’ye hink ye own the place?
Nae siller’s keepit in this hoose,
Nor bric-a-brac for charity.
I ken ye’re efter somethin. Weel,
Ye’ll no be gettin it fae me.
I hae the pest, I’ve tellt ye wance.
It isna safe tae hing aboot.
I amna in but if I wis
Ye widna want me comin oot.
For pity’s sake, there’s naebdy here.
Ye’re ontae plums. Desist and cease.
I’ve cawed the polis onywey,
Sae shift yir erse and gie us peace.
Are ye a Mormon or Jehovah’s?
Ye’re mibbes deif or aff yir heid?
Aye, aye, the warld is endin soon –
Nixt-day delivery guaranteed –
But see, until the fower white vans
O the apocalypse appear,
Lea me alane, get aff ma street.
Vamoose, ya cunt, there’s naebdy here.
Wha is chappin at ma door?
The din is drivin me insane.
I’m in ma pit and dinna hink
I hae the strength tae rise again.
James Robertson (born 1958) is a Scottish writer who grew up in Bridge of Allan, Stirlingshire. He is the author of several short story and poetry collections, and has published seven novels: The Fanatic, Joseph Knight, The Testament of Gideon Mack, And the Land Lay Still, The Professor of Truth, To Be Continued…. and News of the Dead which has just won the Walter Scott Prize for Historical Fiction 2022. The Testament of Gideon Mack was long-listed for the 2006 Man Booker Prize.
James also runs an independent publishing company called Kettillonia, and is a co-founder (with Matthew Fitt and Susan Rennie) and general editor of the Scots language imprint Itchy Coo (produced by Black & White Publishing), which produces books in Scots for children and young people.